എം.പി.നാരായണപ്പിള്ള എഡിറ്ററായിരുന്ന ട്രയൽ വീക്കിലിയൽ 1987-ൽ പ്രസിദ്ധീകരിച്ച കവിത
മറ്റു പൂക്കളെപ്പോൽ
സ്വയമേ വിടരാത്ത പൂവാണു ഞാൻ.
വിടരാൻ, വിടർത്താനുള്ള ശക്തി –
അതാണോ, ദൈവം, നീയാണോ ദൈവം?
ദൈവമുണ്ടന്ന് ഓതുവോരേ
ദൈവത്തെ നിങ്ങൾ കണ്ടുവോ?
കണ്ടു കണ്ടതു മാഞ്ഞുവോ?
ഇത് വെറും ചോദ്യമെന്നോ?
ചോദ്യങ്ങൾ മനസ്സിൽ വിരിഞ്ഞ്
മധുവും, മണവും ചൊരിയുമ്പോൾ
പറവ യെപ്പോലെ –
പറക്കുന്ന, നുഭുതിയാലെ
മിഴികൾക്കു തിളക്കം;
പ്രകാശം പരക്കുന്നു .
ഭാവനയാം വയലിൽ
പ്രകാശം മുള പൊട്ടുമ്പോൾ
ധീരതയാൽ മനം ഉദിക്കുന്നുവോ?
ഭയത്താൽ മനം ഇരുളുന്നുവോ?
ഭയങ്ങൾക്കുമുണ്ടോ വർഗ്ഗം?
വർഗ്ഗം വർഗ്ഗത്തെ പഴിക്കുന്ന
ആശയത്തിൽ ഉദിക്കും പുത്തൻ
തത്ത്വങ്ങളുടെ ചൂടേറ്റുകരിയേണ്ട
ഗതികേട് നിങ്ങൾക്കുമുണ്ടോ?
ഭയങ്ങളേ, നിങ്ങൾക്കുമുണ്ടോ?
നിങ്ങളുടെ കഥകൾ ഞങ്ങൾക്കായി;
ഞങ്ങളുടെ കഥകൾ നിങ്ങൾക്കും.
സമയരഥത്തിനുണ്ടോ വിശ്രമം
സമയമാം രഥത്തിൽ
മറുകര തേടുമെന്നെ
ഭക്ഷിച്ചു വളരുന്ന
ജീവികളുണ്ടന്ന ബോധം
മായാതെ കാക്കുമെൻ മനമേ
നിനക്കു നന്ദി, നിനക്കു നന്ദി.
– എ. ബെണ്ടിച്ചാൽ
