വാക്കാവുന്ന പൂവിനാൽ
തീർക്കാനായില്ല
എനിക്കൊരു ബുക്കെ
തീർന്നതാവട്ടെ ഒരു റീത്ത്
###
ആരൊക്കെയോ
ചേർന്നു വരച്ച ഒരു ഫ്രെയിമിൽ
ഒരാകാശo വീർപ്പുമുട്ടുന്നു
###
നേരമില്ലൊന്നിനും
നേരെയാവാനും
###
അക്കങ്ങൾ മാത്രമാവുന്ന
ഒരു നോട്ട് പുസ്തകത്തിൽ നിന്ന്
അക്ഷരങ്ങൾ
എങ്ങോട്ടാണ് ഒളിച്ചോടുക
###
നിന്നെ ഞാൻ
ഹൃദയം കൊണ്ട് പ്രണയിച്ചു
നീ എന്നെ
മസ്തിഷ്കം കൊണ്ടും
###
കഠാരകൾ മിന്നി മറഞ്ഞു
ടാറിട്ട റോഡിലെ രക്തത്തിൽ
നക്ഷത്രങ്ങൾ മുങ്ങിമരിച്ചു
ചെകുത്താൻ ചിരിച്ചു
###
അടച്ചുവെക്കപ്പെട്ട ആഴമുള്ള കിണറുകളിൽ
നിന്നുയരുന്നു ഓരോ നിലവിളിയുo
###
ഗുരു അറിവ് നൽകി ശിഷ്യൻ മുറിവ് നൽകി
###
ഇണയായി വന്നു നീ
തുണയായി നിൽക്കാൻ
പണം ഫണം വിടർത്തി
നിണം കണങ്ങളായ് ച്ചിതറി
###
ഉള്ളത് പറഞ്ഞവൻ ഉള്ളിൽ
നുണ പറഞ്ഞവൻ നാട്ടിൽ
###
എത്ര ഫ്ലാഷ് മിന്നിയിട്ടും
വെളുത്ത് കണ്ടില്ല പ്രണയത്തെ
ഒന്ന് ഫോക്കസ്ചെയ്യാൻ
###
– അശ്റഫ് കല്ലോട്
