കൂരയും കഞ്ഞിയും അന്യമായെത്രയോ
കോടികൾ പാർക്കുന്നു ഭാരതത്തിൽ
കായം മറച്ചിടാൻ കോടി തുണി കണ്ടം
കിട്ടാത്ത കൂട്ടരിന്നെത്രയെണ്ണം
കാട്ടായ വൃത്തികൾ ചെയ്തോരു ക്രൂരരാ
കേമത്ത ജീവിതം ചെയ്തിടുന്നൂ
കമ്പിയഴിക്കുള്ളിലായോരു കൂട്ടരെ
കേടൊന്നുമില്ലാതെ കാത്തിടുന്നു
കപ്പം കൊടുക്കുന്ന കാശങ്ങെടുത്തിട്ടു
കൂട്ടികുഴച്ചങ്ങു തീറ്റിടുന്നു
കാപ്പിക്കു കാപ്പിയും ചിക്കനും മട്ടനും
കേറ്റീട്ടുപള്ളകൾ ചീർത്തിടുന്നു
കൊന്നവൻ കട്ടവൻ കണ്ടിച്ചു തള്ളിയോൻ
കെട്ടുന്ന ഭാര്യയെ തട്ടിയോനും
കൊഞ്ചുന്ന പ്രായത്തിൽ തുള്ളികളിച്ചോരു
കൊച്ചിനെ ഭോഗിച്ചു തള്ളിയോനും
കള്ളപണം കൂട്ടി കീശ നിറച്ച വൻ
കോത്താഴ സിദ്ധനും വാറ്റിയോനും
കപ്പേള കട്ടവൻ കുത്തി കൊലച്ചവൻ
കൈകാലു വെട്ടിയോരെത്രയെണ്ണം
കൂറതുണി പൊക്കി ഊറ്റം പറഞ്ഞവർ
കണ്ടോൻ്റെ പണ്ടം അടിച്ചു മാറ്റ്യോൻ
കള്ളെന്ന പോഷകം ഉള്ളിൽ നുരഞ്ഞിട്ട്
കാട്ടായ കാര്യം നടത്തിയോനും
കാലേൽ കടിച്ചിടാൻ ചിക്കനും മട്ടനും
കല്ലേൽ പരത്തുന്ന ചപ്പാത്തിയും
കൂട്ടികുഴച്ചിടാൻ കുത്തരി ചോറതും
കൂട്ടം രസിച്ചിടാൻ ടീവീയതും
കെട്ട്യോടെ കാര്യവും കൊച്ചിൻ്റെ കാര്യവും
കൂരേടെ കാര്യവും നോക്കിടേണ്ട
കാലം തികഞ്ഞിടാൽ കായം മെലിഞ്ഞവൻ
കുട്ട്യാനതുല്യം പുറത്തു വരും
കള്ളനേം ദുഷ്ടനേം കാട്ടാള വിത്തിനേം
കായം തടിപ്പിച്ചിട്ടെന്തു കാര്യം
കഷ്ടത്തിലായോൻ്റെ കാര്യം നടത്തിടാൻ
കാര്യസ്ഥരായോർക്ക് കാശതില്ല
കള്ളൻ്റെ തൊണ്ടക്ക് മട്ടൻ കൊടുത്തിടാ
കണ്ഠം മുറുകുന്ന ശിക്ഷ വേണം
കാര്യങ്ങളിപ്പടി മുന്നോട്ടു പോയിടാൽ
കൊള്ള തരങ്ങൾ ശമിച്ചിടില്ല
കാലങ്ങളപ്പുറം കോറിച്ച വാചകം
കാലാന്തരങ്ങളിൽ മാറ്റിടേണ്ടേ
കാലത്തിനൊപ്പം നടത്തുന്ന ചെയ്തിക്ക്
കാരുണ്യമില്ലാത്ത ശിക്ഷ വേണം
– ജോൺസൺ എഴുമറ്റൂർ
