മകളെ വിവാഹം ചെയ്ത് കൊടുത്തു കഴിഞ്ഞാൽ അത് പ്രണയമായാലും അറേഞ്ച്ഡ് മേരേജ് ആയാലും അവരെ ജീവിക്കാന് അനുവദിക്കുക. അവരെ അവരുടെ പാട്ടിന് വിടുക. അല്ലാതെ അവരുടെ ഡ്രൈവര് ആവരുത്. ദാമ്പത്യ ജീവിതത്തിലേക്ക് കാലെടുത്ത് വെക്കുമ്പോൾ ആണായാലും പെണ്ണായാലും അവർക്കെല്ലാം പുതുമയാണ്. വ്യത്യസ്ത ചിന്താഗതിയുള്ളവർ വ്യത്യസ്ത ജീവിത ശൈലിയില് ജീവിച്ചവർ എങ്ങനെ പെരുമാറണം എന്ന് അവർക്ക് അറിയാതെ പോകുന്നു. അവിടെയാണ് മാതാപിതാക്കളുടെ ആവശ്യം വേണ്ടത്.
സ്ത്രീ പീഡനത്തിൻ്റെ യഥാര്ത്ഥ കാരണക്കാർ ഭർത്താവും അവൻ്റെ ബന്ധുക്കളും മാത്രമാണോ? അല്ലെന്നാണ് എൻ്റെ നിഗമനം. സമൂഹത്തിൽ പല കുടുംബങ്ങളിലും കണ്ടുവരുന്ന സ്ത്രീ പീഡനത്തിന് കാരണക്കാർ അവരുടെ വീട്ടുകാർ തമ്മിലാണ് ഏറെയും. അവരുടെ ഈഗൊ, അത് അനുഭവിക്കുന്നത് പെണ്കുട്ടിയും അവളുടെ ഭർത്താവും.
സ്നേഹിക്കാനും ഭർത്താവിൻ്റെ ആവശ്യങ്ങൾ കണ്ടു പ്രവർത്തിക്കാനും ഭാര്യയുടെ എല്ലാ കടമകളും നിർവ്വഹിക്കാനും മകളെ പറഞ്ഞു മനസ്സിലാക്കുക. അതുപോലെ തന്നെ പുരുഷൻ്റെ സ്ഥാനത്തു നിന്നും ഉണ്ടാവണം. സ്ത്രീയെ അടിമയാക്കുകയല്ല വേണ്ടത് അവളെ സ്നേഹിക്കുക ഒരു ഭർത്താവിൻ്റെ പരിലാളനയാണ് അവൾക്ക് വേണ്ടത്.
ആസ്തി അല്ല ജീവിതത്തിൻ്റെ അടിസ്ഥാനം തമ്മില് തമ്മില് ഉള്ള വിശ്വാസം, ആത്മാർത്ഥത, സ്നേഹം, ക്ഷമ, വിട്ടുവീഴ്ചകൾ, എളിമ, നിരഹങ്കാരം ഇതെല്ലാമാണ് ഒരു കുടുംബ ജീവിതത്തിൻ്റെ അടിസ്ഥാനം. വിവാഹിതരായ പെൺകുട്ടികളെ ഓരൊ കാരണങ്ങൾ പറഞ്ഞ് വീട്ടിൽ പിടിച്ചിരുത്തുമ്പോൾ അവളുടെ ഭർത്താവിൻ്റെ നില ഒന്നു ചിന്തിച്ചു നോക്കൂ. ഭാര്യ ഉണ്ടായിട്ടും വിഭാര്യനായി കഴിയേണ്ടിവരുന്ന നിസ്സഹായാവസ്ഥ അത് അവർക്കു മാത്രമെ മനസ്സിലാവുകയുള്ളു. സ്വന്തം മകളെ കുറിച്ച് നിങ്ങള് ചിന്തിച്ചു നോക്കീട്ടുണ്ടോ? നിങ്ങളുടെ മകളോടുള്ള സ്നേഹക്കൂടുതൽ കാരണം മകളുടെ ദാമ്പത്യ ജീവിതമാണ് തകരുന്നതെന്നാദ്യം നിങ്ങള് മനസ്സിലാക്കുക.
അച്ഛനും അമ്മയും ഒന്നിച്ചിരുന്ന് സന്തോഷം പങ്കിടുമ്പോൾ ആ മകൾക്കും ഉണ്ടാവും അതുപോലെയുള്ള ആഗ്രഹങ്ങൾ. ദയവ് ചെയ്ത് നിങ്ങളുടെ മക്കളുടെ കുടുംബ ജീവിതം നിങ്ങളായിട്ട് തകർക്കരുത്. രണ്ടു കൂട്ടരും അവരവരുടെ മക്കളുടെ തെറ്റുകൾ സൗമ്യമായ ഭാഷയില് തിരുത്താൻ ശ്രമിക്കുക. മരുമകളോട് കയർത്തു സംസാരിക്കുക, മരുമകനോട് കയർത്ത് സംസാരിക്കുക ഇതെല്ലാം ഒഴിവാക്കാന് ശ്രമിക്കുക തെറ്റുകൾ തിരുത്തുക അക്രോശം അരുത് അത് അവരുടെ മനസ്സിൽ ഉണങ്ങാത്ത മുറിവുണ്ടാക്കും
കുഞ്ഞുങ്ങളായിക്കഴിഞ്ഞാലും ഭർത്താവിനെ ശ്രദ്ധിക്കാൻ സമയം കണ്ടെത്തുക കടമകൾ നിർവ്വഹിക്കുക. രണ്ടു പേർക്കും ജോലിയുള്ള ഇപ്പോഴത്തെ സാഹചര്യത്തിൽ ബുദ്ധിമുട്ടാണെങ്കിലും വിട്ടുവീഴ്ചകൾക്ക് തയ്യാറായി നല്ലൊരു ദാമ്പത്യ ജീവിതം നയിക്കാന് ശ്രമിക്കുക.
സമൂഹത്തിൽ വിവാഹ മോചനത്തിൻ്റെ ഒരു പരമ്പര തന്നെ നടക്കുകയല്ലേ അതുകൊണ്ട് ഇത്രയും എഴുതി എന്നുമാത്രം.
– കോമളം പരമേശ്വരൻ പാലക്കാട്
