ഉപ്പാക്കല്ലേ ബന്ധുക്കളില്ലാതിരുന്നത്. ഉമ്മാക്ക് എമ്പാടും ബന്ധുക്കളുണ്ടായിരുന്നല്ലോ. അവരിൽ ആർക്കെങ്കിലും ഉപ്പയുടെ ഖബറിനെക്കുറിച്ച്
അറിയുമായിരുന്നെങ്കിൽ നമുക്കതൊന്നു കാട്ടിത്തരാനവർക്ക് മനസ്സുണ്ടായിരുന്നുവെങ്കിൽ
ഉമ്മ ജീവിച്ചിരിക്കുമ്പോൾതന്നെ അവരത് ചെയ്യുമായിരുന്നല്ലോ. ഉമ്മയുടെ മരണത്തോടെ ഇനിയൊരിക്കലുമത് സഫലമാവുകയില്ലെന്നു ബോധ്യപ്പെട്ടതുതുകൊണ്ടാണ് ഞാനാ ആഗ്രഹം ഉപേക്ഷിച്ചത്. അതല്ലാതെ ആ ഖബറൊന്നു കാണാനോ അവിടെ ചെന്ന് ഉപ്പൊയോടൽപ്പനേരം സംസാരിക്കാനോ പൂതിയില്ലാത്തതു കൊണ്ടല്ല.
നിൻ്റെ മനസ്സിൽ ഇങ്ങനെയൊരു ആഗ്രഹമുളള കാര്യം ഇത്രയും കാലത്തിനിടയിൽ എന്നോടെന്തു കൊണ്ടാണ് നീ പറയാതിരുന്നത്.?
ഒന്നാമത്തെ കാരണം നിൻ്റെ മനസ്സ് വേദനിപ്പിക്കരുതെന്ന് കരുതിയത് കൊണ്ടാണ്. രണ്ടാമത്തെകാരണം ഉപ്പയുടെ ഖബർ എവിടെയാന്നെന്ന് നീ അറിഞ്ഞിരുന്നുവെങ്കിൽ, നിന്നോടാരെങ്കിലും ആ ഖബറിനെക്കുറിച്ച് പറഞ്ഞു തരികയോ കാണിച്ചു തരികയോ ചെയ്തിരുന്നുവെങ്കിൽ ആ ദിവസം തന്നെ എന്നെയും മാളൂനെയും കൂട്ടി നീ അവിടേക്ക് ചെല്ലുമായിരുന്നെന്ന് എനിക്ക് നല്ല ബോധ്യമുണ്ടായിരുന്നതുകൊണ്ടാണ്. ഉമ്മയുടെ ഖബറ് സിയാറത്ത് ചെയ്യുന്ന സമയത്തെല്ലാം തന്നെ ഉപ്പയുടെ ഖബറ് കാണാനുള്ള നിൻ്റെ ആഗ്രഹം ഉമ്മയോട് പറയാറുണ്ടെന്നും ഉപ്പാക്ക് വേണ്ടി പ്രത്യേകം പ്രാർത്ഥിക്കാറുണ്ടെന്നും നിൻ്റെ കൂട്ടുകാരിലൂടെ ഞാൻ അറിഞ്ഞിരുന്നതാണ് മറ്റൊരു കാരണം.
കാര്യം നീ പറഞ്ഞതത്രയും ശരിതന്നെയാണ്. എന്നു വെച്ച് നമ്മുടെ ആഗ്രഹം പടച്ചതമ്പുരാൻസാധിച്ചു തരില്ലെന്നോ നമ്മുടെ പ്രാർത്ഥനകൾ കേൾക്കില്ലെന്നോ പറയാൻ പറ്റുമോ. പടച്ചോൻ ഉദ്ദേശിച്ചാൽ അതത്ര പ്രയാസമുള്ള കാര്യമാണെന്ന് നിനക്ക് തോന്നുന്നുണ്ടോ.?
പടച്ചോൻ ഉദ്ദേശിച്ചാൽ നടക്കാത്തതൊന്നുമില്ലെന്ന് നിന്നെപ്പോലെ തന്നെ എനിയ്ക്കും നന്നായറിയാം.
പക്ഷെ.. പടച്ചോനങ്ങനെ വിചാരിക്കാതിരുന്നാൽ നമുക്കെന്ത് ചെയ്യാൻ പറ്റും.
എൻ്റ ഫോണിലേക്ക് ഒരു കോൾ വന്നു കൊണ്ടിരിക്കുന്നുണ്ട്. ഞാനതൊന്ന് അറ്റൻ് ചെയ്തതിനു ശേഷം നിന്നെതിരിച്ചു വിളിച്ചാൽ മതിയോ. ?
ആദ്യം ആരാണ് വിളിക്കുന്നതെന്നു നോക്ക്. അറ്റൻ്റ് ചെയ്യുന്നതും തിരിച്ചുവിളിക്കുന്നതുമെല്ലാം അതിനു ശേഷം തീരുമാനിക്കാം.
നമ്മുടെ സലാമിൻ്റെ നമ്പറിൽ നിന്നാണ് വിളിച്ചു കൊണ്ടിരിക്കുന്നത്. അവനും സുരേഷും കൂടി ജന്നത്തുൽ ബഖിയ്യിലേക്ക് അവൻ്റെ ഉപ്പയുടെ ഖബർ സിയാറത്ത് ചെയ്യാൻ പോകുന്ന കാര്യം രണ്ടു ദിവസം മുൻപ് എന്നോട് പറഞ്ഞിരുന്നു. അവർ അവിടെ എത്തിയിട്ടുണ്ടാകും. ചിലപ്പോൾ അതു പറയാൻ വേണ്ടിയായിരിക്കാം വിളിയ്ക്കുന്നത്.
സലാമാണ് വിളിക്കുന്നതെങ്കിൽ ഉടനെ അറ്റൻ്റ് ചെയ്യണ്ട.
നമ്മളേതായാലും ഉമ്മയുടെ ഖബർ സിയാറത്ത് ചെയ്യാൻ പോകുന്നുണ്ടല്ലോ, അക്കൂട്ടത്തിൽ ഉപ്പയുടെ ഖബറും കൂടെ സിയാറത്തു ചെയ്യാൻ സാധിച്ചുകൂടായ്കയില്ല. അതും ഉപ്പയുടെ ഖബറിൻ്റെ അരികത്തുനിന്നു കൊണ്ടു തന്നെ. അതിനു ശേഷം അക്കാര്യവും കൂടി ചേർത്തു കൊണ്ട് നിനക്കവനോട് സംസാരിക്കാം.
നീ പറഞ്ഞത് സത്യം തന്നെയാണോ.?
അതെ സത്യം തന്നെയാണ്.സംശയമുണ്ടെങ്കിൽ സക്കീനയെ വിളിച്ചു ചോദിച്ചാൽമതി. കാര്യങ്ങളെല്ലാം വിശദമായി തന്നെ അവൾ പറഞ്ഞു തരും.
പിന്നേയ്.. മാളുവിനോട് ഉപ്പയുടെ ഖബറിൻ്റെകാര്യം ഇപ്പോൾ പറയണ്ടട്ടോ. അതൊക്കെ പള്ളിക്കാട്ടിൽ എത്തിയതിനു ശേഷം അതിൻ്റേതായ രീതിയിൽ ഞാൻ പറഞ്ഞോളാം. അതാണ് നല്ലത്.
അസറ് ബാങ്ക് വിളിയ്ക്കാൻ രണ്ടു മണിക്കൂറോളം സമയം കഴിയണ്ടേ. അത്രയും സമയം കാത്തുനിൽനിൽക്കുന്നതെന്തിനാ..ഞാൻ മാളുവിനെയും കൂട്ടി ഇപ്പോൾ തന്നെ പള്ളിയുടെ മുറ്റത്തേക്കുവരാം. അപ്പോഴേക്കും നീ അവിടെ എത്താൻ പറ്റുമോ എന്നുനോക്ക്.
നീ തിരക്കുകൂട്ടാനുള്ള കാരണം എന്താണെന്ന് എനിക്കറിയാം.
പക്ഷേ നീ പറഞ്ഞതുപോലെ അസറിനു മുൻപായി അത് സാധ്യമല്ല.
എന്താ സാധ്യമല്ലെന്നു പറയാൻ കരണം.?
(തുടരും…)
– K.M സലീം പത്തനാപുരം
